Arvid Skogseth
er frå Steinkjer (f. 1952). Eg byrja tidleg med slektsgransking, og var så heldig at eg fekk hobbyen min som yrke, etter at eg tok historie hovudfag ved Universitetet i Bergen i 1994.
Oppgåva mi var om Fedje, der eg då budde. Sidan har eg skrive slektssoger for Fedje, Austrheim, Lindås, Sund og Oppdal, før eg vart pensjonist i 2020.
Begge foreldra mine er frå Frosta like nord for Trondheim, og ettersom kyrkjebøkene der ikkje var digitaliserte, var det naturleg å starta med dei. Det skjedde i 2010, og gjennom arbeidet med slektssogene hadde eg fått god trening med lesing av gotisk skrift, så det var til stor nytte.
Den første kyrkjeboka for Frosta byrjar i 1750. Soknepresten på den tida, Eilert Rosenvinge, er faktisk min 4-tippoldefar (dottera Gunhild vart gift til garden Storlein på Frosta, der mormora mi vart fødd). Han kom til Frosta i 1735, men byrja ikkje å føra kyrkjebok for femten år seinare, etter stadige pålegg frå biskopen. Så eg er ganske sur på Rosenvinge, også fordi den første kyrkjeboka er ganske så ufullstendig. Det vart ikkje skrive namn på barnet og foreldre ved dåpen, berre t.d. slik: Arn Peersen Aadlo, altså Arn, son av Per og bustad Åtlo. Farens farsnamn og namn på mora manglar, slik at det kan vera vanskeleg å finna kven dei var.
Eg skreiv av kyrkjebøkene for Frosta fram til 1850, og då filene frå AMF vart lagde ut, var det naturleg å fortsetja arbeidet ved å korrekturlesa dei. Det har vore gjevande å retta dei mange fantasifulle feilane, og elles føya til opplysningar som ikkje var med. Eg har elles m.a. korrekturlese ein del kommunar for folketeljinga 1920. Eg kjem til å halda fram med digitaliseringsarbeidet, det er både interessant og gjevande.