Om transkripsjonen

Folketeljinga 1825 for Manger

Originalen til folketeljinga 1825 for Manger ligg i Manger prestearkiv i Statsarkivet i Bergen.

I samband med fordelinga av kjøpstadsskatten trong Stortinget ei oversikt over folkesetnaden i byane. Dette
vart utgangspunktet for folketeljinga 1825. Finansdepartementet utvida Stortinget sitt forslag til å famna om
heile riket. Teljinga vart ved kongeleg resolusjon 11. oktober 1825 sett til første søndag i advent, 27. november.
Instruksen er gjeven i sirkulære 20. oktober.

Det skulle takast med opplysningar frå kvart einskild hus i byane og i frå kvart einaste skyldsett bruk på landsbygda. Husmannsplassar som ikkje var skyldsette skulle førast saman med den garden dei høyrde inn under. Dei trong ikkje vera namngjevne på lista, men antalet skulle vera med.

Personane skulle reknast til det huset der dei hadde sitt natteleie og faste opphald. Ein person som var bortreist for ein kortare eller lengre periode skulle teljast på heimstaden, men folk som ikkje var fastbuande vart ikkje registrerte.

Resolusjonen av 11. oktober er trykt i "Love, Anordninger m.m.", bind 4, 1825 side 660 og i "Den Norske Rigstidende" 1825, nr. 85 saman med sirkulæret av 20. oktober. Resultatet av teljinga vart gjort offentleg i "Budstikken" 7. årgang, 1826 spalte 441-576 og 1827 spalte 633-644.

Databasen er laga av Yngve Nedrebø, Statsarkivet i Bergen sommaren 1995.

Fleire opplysningar finn ein i folketeljingar.