Om transkripsjonen

Døde i Manger 1759-1803

Prestegarden i Manger vart øydelagd i brann i mars 1759, og i bålet gjekk alle dei eldre kyrkjebøkene tapt. Soknepresten Wilhelm Frimann (1712-1789) og familien hans var på reise, og slapp unna brannen, men han mista den store boksamlinga si.

Det var ein noko resignert sokneprest Frimann som sette seg ned med ei ny kyrkjebok 6. mars 1759: "Ministerial-Bog for Mangers Præste-Gield hvorudi ved Dag og Datum er indført alle Embeds-Forrætninger fra 6te Martii 1759, da alle de forrige Ministerialia ved den Præstegaarden overgangne u-lykkelige Ildebrand blev lagt i Aske"

Denne kyrkjeboka for Manger er ført med gjennomført orden og vakker skrift, men vi oppdagar fort at han har vore bokstavleg når han skriv at han skulle registrere sine "Embeds-Forrætninger", for når han i statistikken i kyrkjeboka dei første åra skriv talet på døde skil han mellom dei han hadde jordfesta, og dei han ikkje hadde jordfesta. Der han hadde vore med skriv han inn namnet i kyrkjeboka, dei andre er berre tal. Dermed vert det etter kvart berre eit fåtal av dei døde som kom med i boka. Vi har difor laga tabell etter presten sin statistikk, og på grunnlag av databasen. Det er store skilnader. I (kyrkjeåret) 1764 fortel han at det var 111 døde, vi får namn berre på dei 47.

Etter at Frimann døydde vart det ei endring, til det verre. Vi finn ikkje døde registrerte i kyrkjeboka som går frå 1792 til 1815.

I 1777 kom det påbod om innsending av lister til innrulleringssjefen over fødde gutar, konfirmerte gutar og døde av mannkjønn. Og då viste det seg at presten hadde alle namna på dei døde, og i listene som vart sende inn 1777-1803 finn vi namn på det vi må tru er alle døde av mannkjønn i Manger.

Denne databasen er sett saman av desse to kjeldene: kyrkjeboka sine døde 1759-1791, og listene over døde sende frå soknepresten til sjøinnrulleringa 1777-1803. Nokre namn vil ein finne i begge kjeldene, men vi lar dei stå slik dei er registrerte, for dei vil til ein viss grad fylle kvarandre ut.

Bente Kopperdal har registrert dei døde i kyrkjeboka 1759-1791, Yngve Nedrebø har registrert listene over døde i Manger frå Innrulleringssjefens arkiv. Registreringsarbeidet er gjort i august 1999.

| | | | | - | | | | År | Presten sine tabellar | I databasen | | 1759 | 10 m. 18 k. = 28 | 31 | | 1760 | 19+24 m. 21+12 k. = 76* | 38 | | 1761 | 18+23 m. 17+32 k. = 90* | 35 | | 1762 | 25 m. 31 k. = 56 | 70 | | 1763 | 38 m. 38 k. = 76 | 25 | | 1764 | 54 m. 57 k. = 111 | 47 | | 1765 | 64 m. 46 k. = 110 | 24 | | 1766 | 48 m. 50 k. = 98 | 29 | | 1767 | 29 m. 13 k. = 42 | 21 | | 1768 | 25 m. 28 k. = 53 | 15 | | 1769 | 22 m. 26 k. = 48 | 15 | | 1770 | 27 m. 28 k. = 55 | 16 | | 1771 | 37 m. 35 k. = 72 | 23 | | 1772 | 62 m. 53 k. = 115 | 21 | | 1773 | 42 m. 24 k. = 66 | 3 | | 1774 | 39 m. 31 k. = 70 | 18 | | 1775 | 25 m. 35 k. = 60 | 13 | | 1776 | 41 m. 29 k. = 70 | 23 | | 1777 | 40 m. 22 k. = 62 | 58 | | 1778 | 46 m. 38 k. = 84 | 58 | | 1779 | 34 m. 30 k. = 64 | 41 | | 1780 | 55 m. 70 k. = 125 | 62 | | 1781 | 25 m. 28 k. = 53 | 28 | | 1782 | 40 m. 36 k. = 76 | 49 | | 1783 | 27 m. 34 k. = 61 | 45 | | 1784 | 25 m. 25 k. = 50 | 34 | | 1785 | 35 m. 37 k. = 72 | 50 | | 1786 | 39 m. 36 k. = 75 | 61 | | 1787 | 56 m. 60 k. = 116 | 86 | | 1788 | 44 m. 37 k. = 81 | 48 | | 1789 | 40 m. 41 k. = 81 | 50 | | 1790 | 8 m. 8 k. = 16 | 16 | | 1791 | 30 m. 34 k. = 64 | 28 | | 1792 | | 85 | | 1793 | | 24 | | 1794 | | 28 | | 1795 | | 18 | | 1796 | | 26 | | 1797 | | 32 | | 1798 | | 39 | | 1799 | | 61 | | 1800 | | 57 | | 1801 | | 41 | | 1802 | | 43 | | 1803 | | 80 |

• Presten har skilt mellom jordfesta og gravlagde utan jordfesting. Berre dei han jordfesta er tekne med i kyrkjeboka.