Om transkripsjonen

Nokre gongar har presten utelate namn på barn eller barnefaren, andre gongar manglar årstalet. Namn på mor er vanlegvis berre med når det gjeld barn fødd utanfor ekteskap. Bruksnamnet er alltid med også på mora, og er alltid det same som på far til barnet og barnet sjølv.

Databasen inneheld 1154 postar med døypte i åra mellom 1689-1729. Éin post er frå året 1737.

Alle forretningar er førte i kyrkjeboka i rubrikkar for kvart "gardsbruk". Namnet på bruket og eigaren på bruket er plassert i bustadfeltet for alle personar. Dette bruksnamnet består av eit gardsnamn og eit førenamn, truleg namnet på den dåverande (dvs. tidspunktet for første innførsel på bruket) eigar eller brukar av gardsbruket. Foreldra har i tillegg eit gardsnamn som kan vera det same som bruksnamnet, men slett ikkje alltid er det. Dette gardsnamnet er plassert i etternamnsfeltet saman med patronym.

I periodar er skrifta vanskeleg og utydelig. På nokre sider manglar deler av sidene i kyrkjeboka. I slike tilfeller er deler av namna, kyrkjesokn eller årstal borte. Her har eg difor måtte konstruere namna på bakgrunn av dei bokstavane som står att. Konstruerte namn er merka med teiknet * etter namnet. I nokre tilfelle der det har vore tvil om lesemåten har me kontrollert med ei tidlegare avskrift som er gjort av Einar Haarstad for Ættehistorisk institutt. Slike tilfelle er kommentert i merknadsfeltet. Når det ikkje har vore råd å avgjera kva som er rett lesemåte, er dette markert med to spørsmålsteikn. Nokre merknader er førte i kyrkjeboka på latin. Desse er forsøkt oversett til moderne norsk.

Kinn prestegjeld omfatta sokna Kinn, Bru (Svanøy), Eikefjord og Bremanger (til 1863). Bremanger vart skilt ut som eige prestegjeld i 1864.

Marianne Herfindal Johannessen, 21.07.2004